Asadbek Jo‘raboyev: O‘tgan o‘yinda imkoniyatni boy berib, muxlislarni ranjitib qo‘ydik
O‘zbekiston Superligasining 27-turidan o‘rin olgan “Navbahor” – “Nasaf” jamoalari o‘rtasidagi uchrashuv arafasida “lochinlar”ning 21 yoshli mahoratli hujumchisi Asadbek Jo‘raboyev bo‘lajak bellashuv haqidagi fikrlari bilan o‘rtoqlashdi.
- Bo‘lajak raqibimiz – “Nasaf” amaldagi mamlakat chempioni va joriy mavsumda ham o‘z unvonini saqlab qolishga harakat qilmoqda. Shuningdek, “Navbahor”ning “ajdarlar”ga qarshi kechadigan uchrashuvlari azaldan keskin va murosasiz kurashlar ostida kechgan. Shu bois, bu safargi bahs ham bundan mustasno bo‘lmaydi, albatta.
O‘tgan o‘yinda imkoniyatni boy berib, muxlislarni ranjitib qo‘ydik. Shu bois, bo‘lajak uchrashuvda ishqibozlarga quvonch ulashish, g‘alaba qozonish niyatida maydonda tushib, buni amalga oshirish uchun barcha imkoniyatimizni ishga solamiz.
Muxlislardan esa jamoamizni yolg‘izlatib qo‘ymasliklari, stadionda munosib tarzda qo‘llab-quvvatlab turishlarini so‘rayman. Biz esa qo‘ldan kelganicha, ularning ularning ishonchlarini oqlash, uylariga xursand holda qaytishlarini ta’minlashga harakat qilamiz, - dedi Asadbek Jo‘raboyev.
