Anvar Berdiev \"Neftchi\" bilan shartnoma imzoladi
O‘zbekiston futbolining yaqin o‘tmishdagi mohir hujumchilaridan biri Anvar Berdiev "Neftchi" klubida seleksioner murabbiy sifatida ish boshladi.
Anvar To‘xtaevich Berdiev 1978-yil 11-may kuni Qashqadaryo viloyatida tug‘ilgan. Futbolchilik faoliyatini 1994-yilda G‘uzorning "Sho‘rtan" klubida boshlagan. 1997-yildan "Nasaf"da davom ettirgan. 2000-yilda "Neftchi" jamoasiga taklif etilgan Anvar Berdiev o‘zbek futbolida katta muvaffaqiyatlarga erishadi. 2001-yilda futbolchi O‘zbekiston chempioni, 2012-yilda esa chempionatning eng yaxshi to‘purarlari qatoriga kiradi.
2012-yil 29-dekabrda IFFHS faol o‘yinchilar orasida dunyoning eng muvaffaqiyatli top-divizion to‘purarlar ro‘yxatini e’lon qildi. Anvar Berdiev faoliyati davomida 433 ta o‘yinda ishtirok etib, 205 ta gol urgan holda ro‘yxatda 18-o‘rinni egalladi. 2012-yil 31-dekabrda IFFHS yangilangan ro‘yxatini e’lon qildi va Anvar Berdiev 240 ta gol bilan 326 nafar futbolchi orasida 296-o‘rinni egalladi.
1998-yil 24-aprelda futbolchi Ozarbayjon terma jamoasiga qarshi o‘yinda O‘zbekiston milliy terma jamoasi safida debyut uchrashuvini o‘tkazdi. Umuman olganda, terma jamoamiz safida 5 ta uchrashuvda maydonga tushib, 2 ta gol urishga muvaffaq bo‘ldi. Hozirgi kunda 225 ta gol kiritgan Anvar Berdiev O‘zbekiston chempionatlari tarixidagi eng yaxshi to‘purarlaridan biri hisoblanadi.
2019-yilning avgust oyida futbolchilik faoliyatini yakunlagan Anvar Berdiev Farg‘onaning "Istiqlol" klubida Sergey Lebedevga yordamchi murabbiy sifatida ish boshladi. 2023-yildan 2025-yilning may oyigacha "Sho‘rtan" klubi bosh murabbiyi lavozimida faoliyat olib bordi.
