Ўзбекистон футзал федерацияси президенти Испания Қироллик футбол федерациясининг футзал йўналиши раҳбарияти билан учрашди
Бугун, 21-октябрь куни Ўзбекистон футзал федерацияси президенти Бекзод Маматқулов хизмат сафари билан Испанияга ташриф буюриб, Испания Қироллик футбол федерациясининг футзал йўналиши раҳбарияти билан учрашди.
Учрашув давомида Испания Қироллик футбол федерациясининг футзал департаменти раҳбари, мамлакат терма жамоасининг собиқ дарвозабони Пако Седано, Испания миллий терма жамоаси бош мураббийи Феде Видал ҳамда бошқа расмийлар Ўзбекистон делегациясини Испаниядаги футбол ва футзал инфратузилмаси, мутахассислар фаолияти, шунингдек, спортчилар учун яратилган замонавий шарт-шароитлар билан яқиндан таништирди.
Музокараларда икки федерация ўртасидаги ҳамкорлик кўламини кенгайтириш, тажриба алмашиш ва истиқболдаги қўшма лойиҳаларни амалга ошириш масалалари атрофлича муҳокама қилинди.
Учрашувда Ўзбекистон миллий терма жамоасининг собиқ бош мураббийи, айни пайтда Испанияда даволаниш жараёнини давом эттираётган Хосе Мария Мендес — Пулпис ҳам иштирок этди.
Музокаралар якунида томонлар иккита муҳим йўналиш бўйича келишувга эришди:
Ўзбекистон миллий терма жамоалари мураббийлари учун Испанияда малака ошириш ва амалиёт ўташ имкониятларини яратиш;
2027 йилда Ўзбекистон ва Испания миллий футзал терма жамоалари ўртасида ўртоқлик учрашувини ташкил этиш.
🇺🇿Ушбу учрашув Ўзбекистон ва Испания футзал ташкилотлари ўртасидаги ҳамкорликни янги босқичга олиб чиқиш, илғор халқаро тажрибани юртимиз футзалига кенг татбиқ этиш ҳамда мутахассисларимизнинг профессионал салоҳиятини ошириш йўлидаги муҳим қадам бўлди.
