Винисиус: «Турнир давомида ўзимизга бўлган ишончни орттириш учун бу муҳим ғалаба»
Бразилия терма жамоасининг қанот ҳужумчиси Винисиус Жуниор ЖЧ—2026 гуруҳ босқичи доирасида Гаити устидан қозонилган ғалабадан (3:0) кейинги таассуротлари билан ўртоқлашди.
«Марокашга қарши ўйиндан олдин айтганимдек, мен бу ерга терма жамоа билан биргаликда буюк ишларни амалга ошириш учун келганман. Яхши формада бўлганимда, голлар ва голли узатмалар билан ёрдам бериб, бор имкониятимни ишга сола оламан. Бугун мен айнан шундай қилдим ва чемпион бўлишимиз учун шу руҳда давом этишга умид қиламан. Мен [терма жамоада] ўзимни доим уйдагидек ҳис қилганман, аммо буни ҳақиқий натижага айлантира олмаётгандим. Мен яхши ўйинлар ўтказганман, аммо гол ура олмаганман ва бу якунда мени жуда хафа қиларди, ҳолдан тойдирарди.
Жаҳон чемпионатига келганимда бу ўз футболимни намойиш этиш учун энг яхши фурсат эканини билардим, шунинг учун бор кучимни ишга солишга максимал даражада эътибор қаратдим. Шу иккита ўйинда ўзимни яхши кўрсата олдим. Албатта, мен ўсишда давом этишим керак.
Бу биз учун жуда муҳим палла, биз яхши ўйнадик ва голлар ура олдик. Турнир давомида ўзимизга бўлган ишончни орттириш учун бу муҳим. Учта марказий ҳимоячи билан ўйнайдиган рақиб... Бизнинг фикримизча, яратган вазиятларимизни инобатга олсак, кўпроқ гол уришимиз мумкин эди, аммо бу ажойиб ўйин бўлди, ҳамма яхши ўйин намойиш эта олди», — деди Винисиус ўйиндан сўнг.
