Суперлига. «Сурхон» ва «Насаф» воҳа дербисида дуранг ўйнади
Ўзбекистон Суперлигасининг 26-тури доирасида «Сурхон» ва «Насаф» жамоалари ўзаро тўқнаш келди. Учрашув 1:1 ҳисобидаги дуранг билан якунланди.
Дастлаб 66-дақиқада Комронбек Юсуповнинг узатмасидан сўнг Торнике Дзебниаури рақиб дарвозасини ишғол қилиб, «Сурхон»ни ҳисобда олдинга олиб чиқди.
Бироқ мезбонларнинг устунлиги узоққа чўзилмади. Орадан етти дақиқа ўтиб, 73-дақиқада Бобур Абдухолиқовнинг голли узатмасини Сардорбек Баҳромов самарали якунлади ва мувозанатни тиклади — 1:1.
Учрашувнинг 84-дақиқасида «Насаф» ярим ҳимоячиси Муродбек Раҳматов иккинчи сариқ карточкани олиб, майдондан четлатилди. Натижада қаршиликлар баҳснинг қолган қисмини бир киши кам бўлиб ўтказишга мажбур бўлди.
Ушбу натижадан кейин «Насаф» 26 та учрашувда 42 очко жамғарди. «Сурхон» эса очколари сонини 30 тага етказди.
Ўзбекистон Суперлигаси. 26-тур.
31 октябрь.
«Сурхон» — «Насаф» — 1:1
Голлар: Торнике Дзебниаури, 66 (1:0), Сардорбек Бахромов, 73 (1:1).
