Педри: «Жамоа ўйинидан қониқмадим. Тўғрилашимиз керак бўлган кўплаб жиҳатлар бор»
«Барселона» яримҳимоячиси Педри «Жирона» (2:1) билан бўлиб ўтган Ла Лига 9-тури учрашувидан сўнг жамоанинг ўйинини танқид қилди ва сифатни ошириш зарурлигини таъкидлади.
«Жамоа ўйинидан қониқмадим. Жуда кўп нарсани яхшилашимиз керак, айниқса прессингни. Биз яхши ўйнамадик. Кетма-кет иккинчи ўйинда ҳам кутилган даражада чиқиш қила олмадик. Шунингдек, тўп билан ўйинимизни тезлаштириб, кўпроқ вазиятлар яратиш устида ишлаш зарур. Менимча, бизда ўсиш учун катта салоҳият бор. Бу ҳафтада мураббий билан бирга таҳлил қилиб, кейинги ўйинга тайёргарлик сифатини оширишимиз лозим», — деди Педри.
Футболчининг сўзларига кўра, «Барселона»нинг ҳимоя чизиғи юқори жойлашган ҳолда ёмон прессинг қилиш рақибга хавфли вазиятларни яратишни осонлаштирган.
«Агар ёмон прессинг қилсанг ва ҳимояни жуда юқорига чиқариб қўйсанг, рақибга битта орқага ташланган пас билан дарвозабон билан яккама-якка чиқиш имконини берасан. Шунингдек, биз тўп билан ўйинимизни ҳам яхшилашимиз керак. Ҳозирги пайтда ўтган мавсумдагидай аниқ ҳаракат қилмаяпмиз. Яхшиси, бизда ҳали ўсиш имконияти бор ва бу сафар уч очкони қўлга киритдик».
Маълумот учун, «Барселона» ўзининг навбатдаги ўйинини Чемпионлар лигаси доирасида Грециянинг «Олимпиакос» клубига қарши ўтказади.
