«Нефтчи» вакиллари Куала-Лумпурга етиб борди
«Нефтчи» клуби вакиллари Осиё Футбол Конфедерацияси (ОФК) томонидан ташкил этиладиган AFC Champions League Elite 2026/27 мусобақаси доирасидаги тадбирларда иштирок этиш учун Малайзиянинг Куала-Лумпур шаҳрига етиб борди.
Клуб номидан ушбу тадбирларда ижрочи директор Зоҳиджон Ғофуров, матбуот котиби Саидафзал Абдуллаев ҳамда клуб халқаро бўлими вакили Нурилло Субҳонов иштирок этади.
17-август куни мусобақада иштирок этувчи клублар вакиллари учун махсус Club Workshop — клублар семинари ўтказилади.
Семинар давомида иштирокчи клубларга ОФК мусобақаларини ўтказиш тартиби ва талаблари бўйича батафсил маълумот берилади. Жумладан:
— мусобақа ҳақида умумий маълумотлар;
— учрашувларни ташкил этиш ва ўтказиш тартиби;
— ҳакамлик;
— хавфсизлик масалалари;
— тижорат тадбирлари;
— трансляция жараёнлари;
— стадион таблосида намойиш этиладиган маълумотлар;
— медиа тадбирлар;
— VAR ва футбол технологиялари;
— тиббиёт ва анти-допинг масалалари;
— AFCAS — ОФК мусобақаларини бошқариш платформасидан фойдаланиш тартиби.
Шунингдек, семинарда AFC Champions League Elite 2026/27 лига босқичи қуръаси қандай тамойиллар асосида ўтказилиши ҳам тушунтирилади.
18-август куни эса AFC Champions League Elite 2026/27 лига босқичига қуръа ташлаш маросими бўлиб ўтади.
«Нефтчи»нинг Осиёнинг энг нуфузли клублар мусобақасидаги рақиблари айнан шу қуръа натижасида аниқланади.
