Энрике: «Арсенал» каби биз ҳам ўзимизнинг кучли томонларимиздан максимал даражада фойдаланишга ҳаракат қиламиз»
Франциянинг «Пари Сен-Жермен» клуби бош мураббийи Луис Энрике Чемпионлар лигаси финалидаги рақиби – Англиянинг «Арсенал» клуби билан ўз жамоасини таққослади. Учрашув 30 май куни бўлиб ўтади.
«Бу жамоалар бир-бирига қарама-қарши деб ўйламайман. «Арсенал» – Микель Артета қиёфаси ва тимсолида яратилган жамоа. У тўпга эгалик қилишга асосланган Хосеп Гвардиола мафкурасидан бошлагани аниқ. «Арсенал»да ақл бовар қилмайдиган курашувчанлик хислатлари бор, бунда Микелнинг характери кўриниб туради. Бу бутун Европада ҳимояда ўйнаш бўйича энг яхши жамоа, ва бу бир неча йилдан бери шундай. Портловчи уйғунлик. Улар бир ўйинчига боғланиб қолмаган. Стандартлардан кўп гол уришади, гол ўтказмаслик ва кўп гол уриш қобилиятини ўзида мужассам этган.
Кимдир уларни жамоавий голлар урмайди, дейиши мумкин, лекин бу кимни қизиқтиради? «Арсенал»нинг исталган мухлисидан сўранг, ишончим комилки, у бахтли бўлади. Улар Премьер-лигада ғолиб чиқишди ва мен уларни табриклайман. Улар бунга бошиданоқ муносиб эдилар, чунки улар ажойиб мавсум ўтказишди. Улар ўзлари иштирок этган барча турнирларда ғалаба қозонишга жуда яқин эдилар.
Бизнинг ўхшашлигимиз шундаки, «Арсенал» каби биз ҳам ўзимизнинг кучли томонларимиздан максимал даражада фойдаланишга ҳаракат қиламиз. Бунинг учун биз тўпга эгалик қилишимиз ва ўйин орқали ўзимизни намоён этишимиз керак. Биз ҳам стандартлардан гол ура оламиз, лекин ўзаро ҳаракатлар орқали тўпга эгалик қилишни, рақиб ҳимоясини ёриб ўтиш йўлларини излашни яхши кўрамиз ва буни жамоа бўлиб қилишга интиламиз.
Бизнинг ўйинчиларимизда кўплаб ажойиб индивидуал фазилатлар бор, лекин улар ҳам жамоа бўлиб ўйнашади. Ўйлайманки, биз иккита буюк жамоа ҳақида гапиряпмиз. «Бавария» билан бирга бу Европанинг энг яхши учта жамоаси. Буларнинг барчаси шуни англатадики, агар биз улардан устун келмоқчи бўлсак, одатдагидан фарқли равишда мослашишимиз, ўйнашимиз ва ҳимояланишимиз керак бўлади», – дея Энрикенинг сўзларидан иқтибос келтиради УЕФА расмий сайти.
