Қатар дарвозасига супергол урган Тўрғунбоев «Нефтчи»га қайтиши мумкин
Ўзбекистон миллий терма жамоаси ярим ҳимоячиси Азиз Тўрғунбоев тез орада ўз фаолиятини яна мамлакат чемпионатида давом эттириши мумкин. Хусусан, Фарғонанинг машҳур «Нефтчи» клуби футболчини жамоа сафини мустаҳкамлаш учун асосий номзодлардан бири сифатида кўриб чиқмоқда.
Азизнинг Туркиянинг «Сивасспор» клуби билан тузган шартномаси якунланмоқда. Шу билан бирга, жамоанинг Туркия Суперлигасини тарк этгани ҳам унинг қарорини ўзгартишига таъсир кўрсатиши мумкин.
Футбол мутахассислари Тўрғунбоевнинг Ўзбекистон чемпионатига қайтиши унинг мунтазам ўйин амалиёти олиши ҳамда 2026 йилги жаҳон чемпионатига тайёргарлик кўриши учун қулай имконият бўлишини таъкидламоқда.
Шу билан бирга, «Нефтчи» селекция хизмати яна бир марказий ҳимоячи — Рустам Ашурматовни ҳам жамоага олиб келиш масаласини ўрганмоқда. Унга ҳозирча Қозоннинг «Рубин» клуби эгалик қилмоқда. Мутахассислар фикрича, Ашурматов учун жамоа ўзгариши унинг доимий ўйин амалиётига эга бўлиши ва янада ривожланишига хизмат қилади.
Эслатиб ўтамиз, «Нефтчи» — Ўзбекистоннинг энг қадимги ва зафарли клубларидан бири бўлиб, 1962 йилда ташкил этилган ва мамлакат мустақиллиги даврида 5 марта чемпионликни қўлга киритган. Клуб ҳозирда янги мақсадлар йўлида жамоа таркибини жиддий кучайтиришга бел боғлаган.
