Нестор Лоренсо: «Ўзбекистон жуда тартибли ва қандай ўйнашни аниқ билади»
Жаҳон чемпионати K гуруҳи 1-туридан ўрин олган Колумбия – Ўзбекистон учрашуви олдидан Колумбия терма жамоаси бош мураббийи Нестор Лоренсо рақибини менсимаслик яхши эмаслиги ҳақида огоҳлантирди. Унинг таъкидлашича, мундиалнинг илк ҳафтаси ҳеч бир жамоани кучсиз деб ҳисоблаш мумкин эмаслигини кўрсатди.
2022 йилги Жаҳон чемпионатини ўтказиб юборган Жанубий Америка вакиллари бу сафар мусобақага фаворитлардан бири сифатида келмоқда. Бироқ Лоренсо мундиалдаги илк иштирокини ўтказаётган Ўзбекистон терма жамоасини паст баҳолаш катта хато бўлишини айтди.
«Жаҳон чемпионати бизга шуни кўрсатмоқдаки, бу ерда кичик жамоалар йўқ ва ҳеч кимни менсимаслик керак эмас», — деди Лоренсо Ацтека стадионида бўлиб ўтган матбуот анжуманида.
«Ўзбекистон кучли жамоаларга қарши жуда яхши натижалар қайд этган. Уларинг ажойиб мураббийи бор, таркибида эса юқори савиядаги тўрт-беш нафар футболчи мавжуд. Энг муҳими, бу жамоа жуда тартибли ва қандай ўйнашни аниқ билади.»
Колумбия Мексикага муваффақиятли саралаш босқичидан сўнг юқори кайфиятда етиб келди. Жамоа таркибида “Бавария” ҳужумчиси Луис Диас ҳамда тажрибали плеймейкер Хамес Родригес етакчилик қилмоқда.
Лоренсо сўнгги йилларда жисмоний ҳолати билан боғлиқ муаммоларга дуч келган Колумбия сардори Хамес Родригес ўйин олдидан яхши ҳолатда эканини таъкидлади.
«Хамеснинг аҳволи яхши. У жисмоний томондан тобора яхшиланиб бормоқда.
Унинг истеъдоди ва футбол сифати шундайки, бошқалар каби кўп югурмаса ҳам, ўйинга аниқлик олиб киради ва ҳал қилувчи вазиятларда муҳим қарорлар қабул қилади», — деди мураббий.
Аргентиналик мутахассис Колумбия терма жамоаси турнирнинг энг кучли жамоалари намойиш этаётган юқори темпга мослаша олмаслиги ҳақидаги фикрларни ҳам рад этди.
«Биз бундай даражада ўйнай олишимизни аллақачон кўрсатганмиз», — деди у яқинда Хорватия ва Францияга қарши ўтказилган учрашувларни эслаб.
«Яхши футбол ўйнаш фақат кўп югуриш дегани эмас. Баъзида биз интенсивлик билан сифатли футболни адаштириб юборамиз.»
Ацтека стадионида бўлиб ўтадиган учрашувда 65 мингдан ортиқ колумбиявий мухлислар жамоани қўллаб-қувватлаши кутилмоқда. Сўнгги кунларда Мехико кўчаларида Колумбия мухлисларининг сариқ либослари тез-тез кўзга ташланмоқда.
Лоренсо мухлисларга миннатдорчилик билдириб, жамоа саккиз йиллик танаффусдан сўнг Жаҳон чемпионатига қайтган мамлакат учун муносиб ўйин намойиш этишга ҳаракат қилишини айтди.
«Колумбия — бу қувонч демакдир.
Биз яхши футбол кўрсатишни ва инсонларга табассум қилиш учун сабаб беришни истаймиз», — дея якунлади Нестор Лоренсо.
