«Dinamo» jamoasi safidagi o‘yinlari orqali muxlis va mutaxassislar e’tiboriga tushgan Ratinio ikki yillik faoliyatidan keyin jamoa bilan xayrlashdi
«Dinamo» jamoasi safidagi o‘yinlari orqali muxlis va mutaxassislar e’tiboriga tushgan Ratinio ikki yillik faoliyatidan keyin jamoamiz bilan xayrlashdi.
2024 yil boshida Braziliya quyi ligasidan jamoamizga kelib qo‘shilgan Fransisko Ferreyra ajoyib o‘yinlari bilan samarqandlik muxlislar mehrini qozona oldi. Vadim Abramov boshqaruvida «Dinamo» yetakchilaridan biriga aylangan braziliyalik yarimhimoyachi 2024 va 2025 yil yakunlariga ko‘ra, ketma-ket ikki yil PFL tomonidan Superliga ramziy jamoasiga kiritildi. Jamoamizda liganing eng yaxshi legionerlaridan biriga aylangan Ratinio bilan amaldagi kelishuv nihoyasiga yetgach, u o‘z faoliyatini boshqa klubda davom ettirishga qaror qildi.
«Dinamo» PFK Ratinioning keyingi faoliyatiga omad va zafarlar tilab qoladi. Ishonamizki, Samarqand – uning ikkinchi uyi bo‘lib qoladi va «Dinamo» eshiklari uning uchun doim ochiq.
