Arteta «Aston Villa»ni APL chempionligi uchun daʼvogarlardan biri deb atadi
«Arsenal» bosh murabbiyi Mikel Arteta 15-tur doirasidagi safar uchrashuvida «Aston Villa»dan 1:2 hisobida mag‘lub bo‘lgach, bir savolga javob berdi: birmingemliklarni joriy mavsum chempionlikka da’vogar deb bo‘ladimi?
«Ha. Agar ularning qayerda turganiga, qanday futbol ko‘rsatayotganiga, kimlarni yengganiga, ayniqsa uy maydonida, nazar tashlasak — ha. Oldinda hali hamma bir-biri bilan o‘ynaydi, hozir esa ular o‘z o‘rnida, biz esa o‘z o‘rnimizdamiz», — dedi ispaniyalik mutaxassis matbuot anjumanida.
Hozirgi vaqtda «Aston Villa» Angliya chempionati turnir jadvalida 15 o‘yindan so‘ng 30 ochko bilan uchinchi o‘rinda bormoqda. Jamoa 33 ochkoli peshqadam «Arsenal»dan atigi uch ochkoga ortda qolmoqda. Ikkinchi pog‘onani esa 31 ochko jamg‘argan «Manchester Siti» egallab turibdi.
