ЖЧ-2026. Испания – Бельгия: ярим финал йўлланмаси учун гигантлар тўқнашуви
2026 йилги жаҳон чемпионатининг чорак финалида энг қизиқарли қарама-қаршиликлардан бири бўлиб ўтади. Турнирнинг асосий фаворитларидан бири ҳисобланган Испания амбицияларга тўла Бельгия билан куч синашади. Учрашув ғолиби ярим финалда Францияга қарши майдонга тушади.
Испания мусобақада ҳозиргача деярли мукаммал ўйин намойиш этмоқда. Луис де ла Фуэнте шогирдлари гуруҳ босқичини ишончли ўтказди, кейин плей-оффда Австрияни 3:0 ҳисобида мағлуб этди ва 1/8 финалда Португалияни 1:0 ҳисобида енгиб, чорак финалга йўл олди. Энг муҳими, испанлар турнир давомида ҳали бирорта ҳам гол ўтказиб юбормаган.
Жамоанинг асосий қуроллари – ёш юлдуз Ламин Ямал, ҳужумда самарали ўйин кўрсатаётган Микель Оярсабаль ҳамда ярим ҳимоядаги ижодкор футболчилар ҳисобланади. Испаниянинг тўп назорати, тезкор комбинациялари ва мустаҳкам ҳимоя чизиғи уларни чемпионлик учун асосий даъвогарлардан бирига айлантирган.
Бельгия эса турнир давомида характер намойиш қилди. Гуруҳ босқичида биринчи ўринни эгаллаган "қизил иблислар" плей-оффда аввал Сенегални, кейин эса АҚШни 4:1 ҳисобида таслим этиб, чорак финалга чиқди. Руди Гарсия бошчилигидаги жамоа ҳужумкор футбол намойиш этмоқда ва катта ўйинларда тажрибасига суянади.
Бельгия сафида Кевин де Брюйне, Жереми Доку ва захирадан майдонга тушиб ҳам ўйин тақдирини ҳал қила оладиган Ромелу Лукаку каби футболчилар борлиги ҳар қандай рақиб учун жиддий хавф туғдиради. Испаниянинг мустаҳкам ҳимояси айнан шу ҳужум чизиғини тўхтатишга ҳаракат қилади.
Тактик жиҳатдан ҳам бу баҳс жуда қизиқ кечиши кутилмоқда. Испания тўп назорати ва позицион ҳужумларга таянади, Бельгия эса тезкор қарши ҳужумлар ва индивидуал маҳорат орқали имконият излайди. Майдон марказидаги кураш ва қанотлардаги тўқнашувлар учрашув натижасини ҳал қилиши мумкин.
