Ҳусанов билан бирга ўйнаган Роман Папарига: \"Ёшлигимда майдон четида Шацкихга тўп олиб бериб турардим\"
Навоийнинг "Қизилқум" клуби қишда ўз сафига украиналик ҳужумчи Роман Папаригани қўшиб олди. 1999 йилда туғилган футболчи ҳозирча "Қизилқум" таркибида барча мусобақада 7 та ўйинда майдонга тушиб, 2 та гол уришга эришди.
Sports24.uz сайти ўз вақтида ўзбекистонлик футболчилар билан бирга тўп тепган Роман Папарига билан суҳбатлашди.
- Келинг дастлаб футболга илк қадамларни ёдга олайлик...
- Футболга Счастливое қишлоғидаги БЎСМ орқали кириб келганман. Ундан кейин "Мункач" клубининг ўсмирлар жамоасида 5 йил давомида тўп тепдим. 2017 йилда Венгриянинг "Кишварда" клубига кўчиб ўтдим. Сўнгра яна Украинага қайтиб Раховнинг "Карпати" жамоасида ўйнадим. 2019 йилнинг ёзидан 2020 йил март ойига қадар Словакиянинг "Римавска-Собота"да ўйнадим ва кейин коронавирус пандемияси бошланди. Пандемия туфайли Словакияга бора олмадим. Шу пайтда ҳаттоки футболни тугатиш ҳақида ҳам ўйлаб қолгандим. Орада жиянимни "Мункач" футбол мактабига олиб борганимда клуб директори билан учрашиб қолдим. У клубнинг мақсади юқори эканини таъкидлади шу боис яна собиқ клубимга қайтишга ва футболни давом эттиришга ўзимда куч топа олдим. Агентлар менинг ўйинимни кўриб Беларусга "Энергетик-БГУ"га ўтишимга ёрдам беришди. Бу ерда Юревич Анатолий Иванович қўл остида жуда жиддий машғулотларни бошдан кечирдим. Баъзида кунига 3 маҳал машғулотлар бўларди. Айнан шу инсон туфайли ҳам ҳозирги даражага чиқдим десам бўлади.
- Ўзбекистонлик футбол мухлислари "Энергетик-БГУ" клубини яхши билишади. Сиз айнан шу клубда ўзбекистонлик кўплаб футболчилар билан бирга ўйнагансиз.
- "Энергетик-БГУ"даги фаолиятим ажойиб ўтди. Ўзимга бўлган ишонч қайта пайдо бўлди. Бобир Абдихолиқов билан биргаликда ҳужумда тўп тепган йилимиз у 26 та тўп билан гол уриш бўйича рекордни янгилаганди. Ўша йил мен унга кўплаб голли узатмалар бергандим. Бобир билан ҳозир ҳам гаплашиб турамиз. Ҳусанов эса ҳозир топ клубда ўйнамоқда ва бироз вақти камроқ эканини тушунаман. 2024 йил "Нафтан" сафида тўп тепдим ва 9 та гол уришга эришдим. Мавсум тугагач олдимда Ўзбекистондан ташқари жуда кўп вариантлар бор эди. Латвия, Албания, Қозоғистон ва бошқа мамлакатлардан.
- "Қизилқум"га ўтиш қандай амалга ошди?
- Қишда агентлар орқали "Қизилқум" варианти ҳам пайдо бўлди. Шунда мен собиқ жамоадошларим Бобир Абдихолиқов ва Шоҳруҳ Абдураҳмоновдан Ўзбекистон ва хусусан "Қизилқум" ҳақида сўрадим. Ҳар иккаласи ҳам келишни маслаҳат беришди. Бундан ташқари менинг ўйинларим видеосини "Қизилқум" устози Никола Лазаревичга кўрсатишган ва бош мураббийнинг шахсан ўзи мени жамоада кўришни истаган. Бу ерга келиб Лазаревич билан бирга-бир гаплашдик ва мендан нима хоҳлаётганини тушундим.
Ўзбекистон чемпионати жуда ҳам қизиқарли экан. Ҳар бир жамоа майдонга ғалаба учун тушмоқда ва барча ўйинлар қийин ўтмоқда.
- Абдихолиқов ва Ҳусановни қандай ёдга оласиз?
- Иккаласи ҳам ҳаётда тарбияли йигитлар. Майдонда эса ҳақиқий профессионаллар. Уларни яхши савиядаги футболчилар деб биламан. "Энергетик-БГУ"га келганимда Ҳусанов ўша ерда эди. Ёш ва қобилиятли йигитнинг майдондаги ҳаракатларини кўриб хайрон қолардим. Унинг мақсадлари ўшандаёқ катта эди. Машғулотларда 100 фоиз ишларди.
- Ўзбекистон Суперлигасида гол уриш қийинми ёки осон?
- Нима десам экан. Ҳозирча Суперлигада битта гол урдим. Яна битта голни кубокда урдим. Чемпионат ва мамлакатга мослашишда давом этмоқдаман. Суперлига савияси ҳам юқори эканини айтдим. Ҳар бир ўйинга гол уриш ва жамоамга фойда келтиришни ўйлаб тушаман. Энг асосийси ғалаба, шахсий натижаларим эса иккиламчи.
- Беларусь ва Ўзбекистон чемпионатларини таққослай оласизми? Чемпионатларнинг кучли жиҳатлари нимада?
- Ўйлашимча охирги 5 йилда Беларусь чемпионати савияси бироз тушди, Ўзбекистонда эса аксинча 5 йилда савия ўсди. Буни келаётган кучли легионерлардан ҳам кўриш мумкин. Беларусь чемпионатида кўп футболчилар жисмоний томонлама кучли, Ўзбекистонда эса техник футболчилар кўпроқ. Ўзбекистонда умуман олганда футбол ривожланиб бормоқда. Миллий терма жамоа деярли Жаҳон чемпионатида, яқиндагина U-17 терма жамоа Осиё чемпиони бўлди, Ҳусанов 2 йил олдин U-20 терма жамоаси билан Осиё чемпиони бўлганди.
- Ўзбекистонда футболдан ташқари нималар ёқди?
- Тошкент ва Самарқанд шаҳарларида бўлдим. Тарихий обидаларни кўриб катта таассуротлар олдим. Ўзбек миллий таоми ошни тановул қилдим. Менга жуда ёқди. Ўзбекистонда бахтлиман.
- Никола Лазараевич ҳақида нима дея оласиз?
- Бош мураббий билан бирга ишлаётганимга унча кўп бўлгани йўқ. Лекин кучли мутахассис эканини сездим. У доим бизни ғалабага чорлайди. Жуда оғир ва босиқ инсон. Ўйиндан-ўйинга кучайиб боришимиз учун нималар қилиш кераклигини айтади. Бизга ишонади, биз ҳам унга ишонамиз.
- Максим Шацкихнинг ўйинларини кўрганмисиз?
- Унинг "Динамо"даги фаолияти жуда ажойиб чиққанини фақат рақамлар орқали биламан холос. Чунки ёш бўлганман. Лекин Киевнинг "Арсенал" клубида ўйнаган пайтида мен майдон четида Шацкихга тўп олиб бериб турганларимни эслайман.
