Ўзбекистон терма жамоаси легионерлари учун мавсум қачон тугайди?
5 июн куни Ўзбекистон терма жамоаси ЖЧ-2026 саралаш босқичи доирасида Бирлашган Араб Амирликларига сафар қилади. Ушбу ўйиндаги ғалаба Ўзбекистонни тарихда биринчи марта Жаҳон чемпионатига олиб чиқади. Шунинг учун Тимур Кападзе БАА билан ўйинга пухта тайёргарлик кўриш учун терма жамоани олдиндан йиғмоқчи.
Аслида ФИФА кунлари 2 июндан бошланади. Аммо Кападзе май ойининг охирида хорижда машғулот йиғини ташкил қилишни режалаштирмоқда. Хўш, агар терма жамоа ФИФА кунигача йиғилса, хорижий чемпионатларда тўп сураётган легионерлар қачон бу учрашувга қўшилишлари мумкин? Sports24.uz сайти терма жамоа легионерлари ўйнаётган клублар қачон сўнгги ўйинни ўтказишини аниқлади.
Элдор Шомуродов (Рома, Италия)
25 май куни Италия Serie A мавсуми якунланади. Рим клуби сўнгги турда Туринда "Торино"га қарши ўйнайди. Ҳозирда Рома 57 очко билан 7-ўринда бормоқда.
Абдуғодир Хусанов ("Манчестер Сити", Англия)
38-турнинг сўнгги ўйинлари 25 май куни режалаштирилган. Сўнгги турда "Сити" Лондонда "Фулхэм" меҳмони бўлади. Ҳозирда Гвардиоланинг жамоаси 61 очко билан учинчи ўринда бормоқда.
Ҳусниддин Аликулов (Ризеспор, Туркия) ва Азизбек Турғунбоев (Сивасспор, Туркия)
Туркия Суперлигаси мавсуми 1 июн куни якунланади. Шу куни "Ризеспор" "Хатайспор"ни қабул қилади, "Сивасспор" эса "Аланяспор" меҳмони бўлади. Туркияда фаолият юритаётганлар терма жамоага энг кеч қўшиладиганлардир.
Рустам Ашурматов (Рубин, Россия) ва Аббосбек Файзуллаев (ЦСКА, Россия)
Россия Премьер-лигаси мавсуми 24 май куни якунланади. Қозон "Рубин" сўнгги турда уйида "Оренбург"га қарши ўйнайди, ЦСКА эса Москвада "Пари НН"ни қабул қилади.
Бобир Абдихолиқов ("Сумгаит", Озарбайжон)
Озарбайжон чемпионатидаги сўнгги ўйинлар 23 май куни режалаштирилган. Шу куни "Сумгаит" клуби сафарда "Сабайл"га қарши ўйнайди. Ҳозирда Абдихолиқовнинг клуби 29 очко билан 8-ўринда бормоқда.
Хoжимат Эркинов ("Ал-Ваҳда", БАА)
БАА Про Лигасининг мавсуми 12 май куни якунланади. Сўнгги турда "Ал-Ваҳда" "Дибба Ал-Хисн"га қарши ўйнайди. Ҳозирги вақтда Ал-Ваҳда 37 очко билан 4-ўринда бормоқда.
Отабек Шукуров ("Ал-Файҳа", Саудия Арабистони)
Саудия Арабистони чемпионатининг сўнгги тури 26 май куни режалаштирилган. Сўнгги ўйинда "Ал-Файҳа" "Ал-Шабаб"ни қабул қилади. Ҳозирда Шукуровнинг жамоаси 30 очко билан 14-ўринда бормоқда.
Жалолиддин Машарипов ("Истиқлол", Эрон), Уткир Юсупов ("Фулад"), Остон Урунов ("Персеполис", Эрон)
Эрон чемпионатида уч нафар ўзбек футболчиси бир вақтда тўп сурмоқда. Ушбу мамлакат чемпионати 15 май куни якунланади. "Истиқлол" сўнгги ўйинни "Сепахан"га қарши, "Фулад" "Малаван" меҳмони бўлиб ўйнайди. "Персеполис" эса уйида "Гавадар"ни қабул қилади.
