«У тарихдаги энг зўри». Хулиан Альварес — Мессининг дубли ҳақида
Аргентина терма жамоаси ҳужумчиси Хулиан Альварес ЖЧ-2026 гуруҳ босқичининг 2-турида Австрия устидан қозонилган ғалабадан (2:0) сўнг дубль қайд этган жамоа сардори Лионель Мессининг ўйини ҳақида фикр билдирди.
«Таъсирли. Ростини айтсам, сиз айтганингиздек, қўшимча қилишга сўз йўқ. Биз буни ҳар куни кўрамиз, у шунча йиллардан бери ўзининг сеҳрини, иқтидорини намойиш этиб келмоқда. У тарихдаги энг зўри ва биз доим ундан завқланишга ҳаракат қиламиз», — дея Альвареснинг сўзларидан иқтибос келтиради Mundo Deportivo.
Альвареснинг ўзи 64-дақиқада Лаутаро Мартинеснинг ўрнига захирадан майдонга тушди. Турнир давомида «Атлетико» ҳужумчиси клуб мавсуми якунида олган жароҳати сабабли ўйинларни захирада бошлаётганди.
Аргентина иккита учрашувдан сўнг олти очко жамғарди ва J гуруҳида биринчи ўрин билан муддатидан аввал плей-оффга йўл олди. Аргентиналиклар навбатдаги ўйинни 28 июнь куни Иордания жамоасига қарши ўтказади.
