Рюдигер фаолиятини «Реал»да давом эттирмоқчи
Томонлар ўртасида тузилган амалдаги шартнома жорий мавсум охирида якунга етади.
ФОТО: Getty Images
Мадриднинг «Реал» клуби марказий ҳимоячиси Антонио Рюдигер фаолиятини «қаймоқранглилар» сафида давом эттирмоқчи. Бу ҳақда журналист Хорхе Пикон ўзининг X (собиқ Twitter) ижтимоий тармоғида хабар берди.
Манбага кўра, Германиялик футболчи агар «Реал» шартномани узайтиришни таклиф қилса, бу вариантни албатта кўриб чиқишга тайёр. Томонлар ўртасида тузилган амалдаги келишув 2026 йилнинг ёзида якунга етади.
Маълумот учун, Рюдигер ҳозирда жароҳати сабаб узоқ муддатга сафдан чиққан. Қайд этилишича, ҳимоячи жорий йил охиригача тўлиқ тикланишни мақсад қилган.
Эслатиб ўтамиз, Рюдигер 2022 йилдан буён «Реал» сафида тўп сурмоқда. Унинг Transfermarkt'даги нархи 15 миллион еврога баҳоланмоқда.
Насрулло Каримов
Журналист
