RFEF “Осасуна”нинг “Барселона” устидан берган шикоятини рад этди
Испания Қироллик футбол федерацияси (RFEF) “Осасуна”нинг “Барселона”га қарши Ла Лиганинг 27-турида Иниго Мартинесни майдонга туширгани учун берган шикоятини рад этди. Бу ҳақда Mundo Deportivo нашри хабар бермоқда.
“Осасуна”нинг қайд этишича, каталонияликлар ФИФА регламентига зид иш қилган. Яъни, тиббий сабабларга кўра терма жамоани тарк этган футболчи халқаро танаффус тугаганидан кейин беш календарь кунида ўз клубида ўйнаш ҳуқуқига эга эмас.
Таъкидланишича, RFEF Мартинес 17-март куни тиббий сабабларга кўра Испания терма жамоаси лагерини тарк этганини эълон қилган.
Манбага кўра, RFEF ҳар икки томоннинг далилларини ўрганиб чиққан ва Мартинеснинг терма жамоадан четлатилиши белгиланган тартиб асосида амалга оширилганини тасдиқлаган.
Таъкидланишича, агар клуб футболчини терма жамоага қўйиб юборишдан бош тортса ёки унинг ўзи буни рад этса, беш кунга клуб ўйинларида иштирок эта олмайди.
