Лука Модрич Роналду ёки Мессининг жамоадошига айланиши мумкин
39 ёшли хорватиялик ярим ҳимоячи Лука Модрич Криштиану Роналду ёки Лионель Мессининг жамоадошига айланиши мумкин. Бу ҳақда Footmercato нашри хабар бермоқда.
Манбага кўра, 2025 йилги клублар ўртасидаги Жаҳон чемпионатидан сўнг “Реал”ни эркин агент сифатида тарк этадиган Модрич “Ан-Насср” ва “Интер Майами” клубларидан трансфер таклифи олган.
Бундан ташқари, хорват футболчига Саудиянинг “Ал-Иттиҳод” ва Бразилиянинг бир қатор клублари ҳам қизиқиш билдирмоқда.
Қайд этилишича, Модрич Роналду билан бир жамоада ўйнаш учун “Ан-Насср”га ўтиш имкониятларини анчадан бери муҳокама қилиб келган, бироқ футболчининг оиласи АҚШга кўчиб ўтишни афзалроқ вариант деб ҳисобламоқда.
Маълумот учун, Модрич 2012 йилдан буён “Реал”да ўйнаб келмоқда. Бу давр мобайнида у жамоа билан 28 та соврин, жумладан, 6 марта Чемпионлар Лигаси ғолиблигини қўлга киритган. Лука жамоа сафида 590 та ўйин ўтказиб, 43 та гол ва 95 та голли узатмага муаллифлик қилган.
