Ламин Ямал “Барселона”да клуб рекордини ўрнатди
“Барселона”нинг 17 ёшли вингери Ламин Ямал каталонияликлар сафида 100-ўйинини ўтказди.
“Кўк-анорранглилар” Чемпионлар Лигаси ярим финалининг дастлабки ўйинида “Интер”га қарши баҳс олиб бориб, 3:3 ҳисобида жанговар дурангга имзо чекди.
Шу тариқа, Ямал “Барселона” таркибида 100 та ўйин ўтказган энг ёш футболчига айланди. У бу натижага 17 ёш 291 кунлигида эришди.
Аввалроқ бу рекорд Гавига тегишли эди. Испаниялик футболчи ўзининг 100-ўйинини 19 ёш 30 кунлигида ўтказган эди. Рейтингнинг учинчи поғонасини эса 19 ёш 85 кунлик билан Боян Кркич эгаллаб турибди.
Эслатиб ўтамиз, Ямал 2023 йилнинг апрел ойида “Барселона” сафида дебют қилганди. У 100 та ўйинда жами 22 та гол урди ва 33 та голли узатмани амалга оширди.
Маълумот учун, испаниялик иқтидор жорий мавсум барча турнирларда 49 та ўйинда майдонга тушиб, 15 та гол урди ва 24 та голли узатмани амалга оширди. Унинг Transfermarkt'даги нархи 180 миллион евро баҳоланмоқда.
