Кутилмаган қарор! “Реал” Винисиус Жуниорни сотишга тайёр
Футбол
Насрулло Каримов
Журналист
ФОТО: Football365
Мадриднинг “Реал” клуби раҳбарияти ёзги трансферлар вақтида Винисиус Жуниор билан хайрлашишга тайёр. Бу ҳақда Football Transfers хабар бермоқда.
Манбага кўра, “қаймоқранглилар” янги шартнома бўйича музокаралар чоғида бразилиялик футболчидан ҳафсаласи пир бўлган. Эндиликда клуб Винисиус бўйича таклифларни кўриб чиқмоқчи.
Қайд этилишича, агар Саудиядан бразилиялик вингер бўйича рекорд даражадаги таклиф тушса, “Реал” буни қабул қилади.
Маълумот учун, Винисиус жорий мавсум мадридликлар сафида жами 39 та ўйинда майдонга тушиб, 18 та гол урди ва 11 та голли узатмани амалга оширди. Унинг Трансфермарктъдаги нархи 200 миллион еврога баҳоланмоқда.
