Хаби Алонсо Лука Модрични “Реал”да сақлаб қолмоқчи
Клублар ўртасидаги Жаҳон чемпионати арафасида “Реал” бош мураббийи этиб тайинланиши кутилган испаниялик мутахассис Хаби Алонсо янги жамоаси учун трансфер сиёсати устида иш бошлади. Бу ҳақда Marca нашри хабар бермоқда.
Манбага кўра, Алонсо энг аввало Лука Модрични жамоада сақлаб қолишни истаяпти. 39 ёшли хорват футболчисининг шартномаси жорий мавсум охирида якунланади ва “қаймоқранглилар” раҳбарияти унинг ёшини инобатга олиб, шартномани узайтирмасликка қарор қилган.
Шу сабабли, Алонсо “Реал” раҳбариятидан қарорни ўзгартиришни ва Модричга янги бир йиллик шартнома таклиф қилишни сўраган. Футболчининг ўзи эса 2026 йилда бўлиб ўтадиган Жаҳон чемпионатидан сўнг фаолиятини “Сантьяго Бернабеу”да якунлашни истамоқда.
Мадрид клубида қолиш учун Лука Модрич маошини сезиларли даражада камайтиришга ҳам тайёр. Алонсо раҳбарият унинг фикрини инобатга олиб, фахрий футболчи билан ҳамкорликни келаси йилнинг июн ойигача давом эттиришга рози бўлишига умид қилмоқда.
