«Барселона» Ламин Ямалга муносиб ўринбосар топди
Футбол
Насрулло Каримов
Журналист
ФОТО: Getty Images
Каталониянинг «Барселона» клуби ПСВ вингери Иван Перишични ўз сафларига қўшиб олишни истамоқда. Бу ҳақда BILD нашрига таянадиган Mundo Deportivo хабар бермоқда.
Манбага кўра, 36 ёшли хорватиялик футболчининг ПСВ билан амалдаги шартномаси жорий йилнинг 30-июнида якунланади. Томонлар ҳозирча битимни узайтириш бўйича алоқа ўрнатмаган.
Қайд этилишича, «Барселона» бош мураббийи Ханс-Дитер Флик Перишич билан «Бавария»да бирга ишлаган ва энди уни Ламин Ямалга рақобатчи сифатида жамоага олиб келмоқчи.
Маълумот учун, Иван Перишич 2024 йил сентябридан буён ПСВ клубида тўп сурмоқда. У ўтган мавсум барча турнирларда 39 та ўйинда майдонга тушиб, 16 та гол урди ва 11 та голли узатмани амалга оширди.
