«Arsenal» ҳимоячиси Бен Уайт жиддий жароҳат олиб, мавсум охиригача сафдан чиқди
Лондоннинг «Arsenal» клуби ҳимоячиси Бен Уайт Англия Премьер-лигасининг 36-туридан ўрин олган «Вест Хэм»га (1:0) қарши баҳсда тиззасидан жароҳат олди. Олинган жароҳат сабабли футболчи жорий мавсумда бошқа майдонга тушолмайди.
«Якшанба куниги «Вест Хэм»га қарши ўйиндан сўнг ўтказилган текширувлар ва мутахассислар консультацияси шуни тасдиқладики, Бен Уайт тиззасининг медиал боғламларидан жиддий жароҳат олган. Бу эса унинг мавсумнинг қолган қисмини ўтказиб юбoришини англатади.
Айни дамда клубимиз тиббий жамоаси Беннинг соғлиғини тиклаш ва реабилитация жараёнлари билан шуғулланмоқда. Барча ҳаракатлар футболчининг янги мавсумолди тайёргарлик машғулотларига қадар сафга қайтишига қаратилган», — дейилади «Arsenal» расмий сайти берган баёнотда.
Маълумот учун, 36-турдан сўнг «Arsenal» 79 очко билан AПЛ турнир жадвалида пешқадамлик қилмоқда. Битта захира ўйинига эга бўлган «Манчестер Сити» (74 очко) «тўпчилар»дан 5 очкога ортда қолмоқда.
