Араухо Каталония дербисига қадар сафга қайтиши мумкин
«Барселона» марказий ҳимоячиси Роналд Араухо психологик сабабларга кўра олган танаффусдан сўнг жамоа сафида майдонга қайтишга яқин. Бу ҳақда Dailysports нашри ASга таянып хабар бермоқда.
Уругвайлик футболчи ЁЧЛ умумий босқичининг 5-турида «Челси»га қарши ўйиндан (0:3) сўнг номаълум муддатга сафдан чиқарилганди. Учрашувда Араухо асосий таркибда майдонга тушган, бироқ танаффусга қадар қизил карточка олиб, кескин танқидларга учраган эди. Шундан сўнг ҳимоячи клуб раҳбариятига руҳий чарчоқ ва ўзига бўлган ишонч йўқолгани ҳақида маълум қилиб, тикланиш учун вақт сўраган. «Барселона» раҳбарияти футболчини қўллаб-қувватлаб, унга дам олиш имконини берган.
Танаффус давомида Араухо Исроилга саёҳат қилган. Клуб ичидаги манбаларга кўра, бу қарор футболчи учун фойдали бўлган.
Кутилишича, Араухо 29 декабрь куни асосий жамоа билан машғулотларга қайтади. Ўйинларда қатнашишдан аввал у тиббий кўрикдан ўтади. Агар ҳеч қандай муаммо аниқланмаса, уругвайлик ҳимоячи 3 январь куни бўлиб ўтадиган «Эспаньол»га қарши Каталония дербисига қайдномага киритилиши мумкин.
Жорий мавсумда Роналд Араухо «Барселона» сафида 15 та учрашувда майдонга тушиб, 2 та гол муаллифи бўлган.
