Англия — Аргентина: ЖЧ яримфинали олдидан қўшма рамзий таркиб тузиб кўрилди
Бугун оқшом Англия ва Аргентина терма жамоалари ЖЧ-2026 яримфиналида ўзаро тўқнаш келади. Бу баҳс икки жамоа ўртасидаги тарихий рақобатдаги энг йирик учрашувлардан бири бўлиши мумкин.
Бугунги ўйин олдидан Англия ва Аргентина футболчиларидан иборат қўшма рамзий таркибни тузиб кўрдик.
Дарвозабон: Эмилиано Мартинес — Аргентина
Бу позицияда ўз терма жамоалари сафида кўпинча кутилганидан ҳам юқори савияда ўйнайдиган икки дарвозабон ўртасида танлов бўлди. Жордан Пикфорд Норвегияга қарши омадсиз ўйинини инобатга олмаганида, Англияни деярли ҳеч қачон панд бермаган. Бироқ амалдаги жаҳон чемпиони Аргентина дарвозабони Эмилиано Мартинеснинг умумий фаолияти янада таъсирли кўринади. Тўртта халқаро соврин ва иккита Яшин мукофоти танловни аргентиналик посбон фойдасига ҳал қилади.
Ўнг қанот ҳимоячиси: Рис Жеймс — Англия
Рис Жеймснинг сон мушаги жароҳатидан кейин сафга қайтиши Англия учун катта куч бўлди. «Челси» сардори соғлом ҳолатда дунёдаги энг яхши ўнг қанот ҳимоячиларидан бири ҳисобланади. Муаммо шундаки, у доимий равишда соғлом ҳолатда бўла олмаяпти.
Марказий ҳимоячи: Кристиан Ромеро — Аргентина
Аргентина футболида жанговар марказий ҳимоячилар етиши анъанаси узоқ тарихга эга. Кристиан Ромеро ҳам айнан шу мактаб вакили. «Тоттенхэм» сардори ғалабага бўлган тинимсиз интилиши билан ажралиб туради. Шу билан бирга, у тўп билан муомала қилишда ҳам анча ишончли.
Марказий ҳимоячи: Лисандро Мартинес — Аргентина
«Манчестер Юнайтед» ҳимоячиси Аргентина сафида ушбу турнирни юқори савияда ўтказмоқда. У Кабо-Вердега қарши ғалабали ўйинда гол уриб, битта ассист ҳам қайд этди. Мисрга қарши баҳсдаги биоз беқарор ўйиндан сўнг Лисандро чорак финалда Швейцарияга қарши учрашувда ажойиб ҳаракат қилди.
Чап қанот ҳимоячиси: Нико О’Райли — Англия
Премьер-лиганинг мавсумдаги энг яхши ёш футболчиси ушбу турнирда Англиянинг чап қанот ҳимоясидаги ўрнини мустаҳкамлаб олди. У техник маҳорат ва жисмоний кучни уйғунлаштира олади. Балки унинг энг қулай позицияси биоз олдинроқдадир, аммо энди уни Лионель Месси ва амалдаги жаҳон чемпионларига қарши катта синов кутмоқда.
Ярим ҳимоячи: Эллиот Андерсон — Англия
Жуд Беллингем ва Харри Кейндан ташқари, Эллиот Андерсон Англиянинг ушбу турнирдаги энг яхши футболчиларидан бири бўлиб турибди. 116 миллион фунтга баҳоланган футболчи Томас Тухел ундан кутган барча вазифаларни бажармоқда. Шу орқали у нега «Манчестер Сити» ёзда уни қўлга киритиш учун катта маблағ сарфлашга тайёр бўлганини кўрсатиб қўйди.
Ярим ҳимоячи: Деклан Райс — Англия
Ҳозирги босқичда Деклан Райс чарчоқ чегарасида ўйнаётгандек тасаввур қолдирмоқда. Аммо Англия «Арсенал»да «от» лақабини олган футболчидан яна икки катта пойга кутмоқда. Энг яхши ҳолатида Райс юқори даражадаги «box-to-box» ярим ҳимоячи ҳисобланади.
Ярим ҳимоячи: Жуд Беллингем — Англия
Турнир олдидан Жуд Беллингемга шубҳа билан қараганлар ҳозир хато қилганини англамоқда. У катта ўйинлар футболчиси эканини яна бир бор исботлади. Шимолий Америкадаги турнирда кучли таъсир кўрсатаётган Беллингем дунёнинг энг яхши футболчиларидан бири мақомини қайта мустаҳкамлади.
Ҳужумчи: Лионель Месси — Аргентина
Ҳатто 39 ёшида ҳам Лионель Месси дунёнинг энг яхши футболчиси бўлиб қолаётган бўлиши мумкин. Унинг бу ёздаги ўйинларини кўриб, бунга қўшилмаслик қийин.
Месси яна катта саҳнада сеҳр кўрсатмоқда. Унинг 8 та голи Аргентинани кетма-кет иккинчи бор Жаҳон чемпионати финалига бир қадам яқинлаштирди. Агар у ушбу турнирда яна ғалаба қозонса, футбол тарихидаги энг буюк футболчи эканига оид баҳслар бутунлай якунланиши мумкин. Гарчи кўпчилик учун бу савол аллақачон жавобини топган бўлса ҳам.
Ҳужумчи: Хулиан Алварес — Аргентина
Аргентина Хулиан Алвареснинг сафга қайтиб, яна гол ураётганидан мамнун бўлса керак. Унинг Швейцарияга қарши урган ажойиб голи Мессидан ташқари ҳам катта хавф борлигини эслаб қўйди.
Ҳужумчи: Харри Кейн — Англия
Харри Кейн XXI асрдаги энг сермахсул мавсумлардан бирини Жаҳон чемпионлиги билан якунлашни истайди.
У 2025/26-йилги мавсумда клуб ва терма жамоа сафида 70 тадан ортиқ гол уриб, «Олтин тўп» учун жиддий даъвогар эканини яна бир бор исботлади.
