“Реал” сафида энг кўп гол урган футболчилар. Топ-10
Мадриднинг “Реал” клуби улкан тарихга бой жамоа ҳисобланади. Бу клубда кўплаб юлдузлар ва ўз даврининг энг яхши футболчилари тўп сурган. Айниқса, ҳужумлар борасида гап кетганда, катта-катта номлар кўз олдимизга келади. Қуйида эътиборингизга “Реал” тарихида энг кўп гол урган ҳужумчиларни таништириб ўтамиз.
10. Эмилио Бутрагеньо – 171 гол
Клубнинг афсонавий ҳужумчиси 1982-1995 йилларда “Реал” сафида тўп сурган. Бу вақт давомида Эмилиано 463та ўйинда майдонга тушиб, рақиблар дарвозасини 171 маротаба аниқ нишонга олган.
“Қироллик” клуби билан Испания чемпионатида 6 бор чемпион бўлган. “Реал”дан кетганидан сўнг “Кастилья”да ўйнади. Сўнгра фаолиятининг сўнгги қисмини Мексика чемпионатида ўтказган.
9. Пирри – 172 гол
Тўлиқ исми-шарифи Хосе Мартинес Санчес бўлган Пирри 1964-1980 йилларда “Реал” либосида тўп сурган ва ўша вақтнинг энг кучли ҳужумларидан бири бўлган.
Мадрид клубида Пирри 561та ўйинда майдонга тушиб, 172 маротаба гол урган. Клуб тарихида энг кўп гол урган футболчилардан бири сифатида тарихда қолган.
8. Франсиско Хенто – 182 гол
Ўз даврининг энг машҳур футболчиларидан бири бўлган Хенто 1933 йилда туғилган. Ярим ҳимоя амплуасида ўйнаганига қарамай, кўплаб голларга муаллифлик қилган. У “Реал”да 1953-1971 йилларда ўйнаган. 182 маротабаь гол урган. 600та учрашувда майдонга тушган.
У 12 маротаба “қироллик” клуби билан Испания чемпионатида зафар қучган. 2022 йилда эса Франсиско Хенто вафот этган.
7. Уго Санчес – 208 гол
Мексикалик бўлган Уго Санчес фаолияти давомида кўплаб жамоаларда ўйнаган. Аммо унинг юлдузлик онлари сўзсиз “Реал”да бўлиб ўтган. Мадрид клубида Санчес 7 йил ўйнаган. Бу вақт давомида 283та ўйинда майдонга тушиб, 208та голга муаллифлик қилгани билан ёдда қолган.
1990 йилда у “Олтин бутса” соҳибига ҳам айланган. Испания чемпионатида 5 маротаба чемпион бўлган.
6. Ференц Пушкаш – 242 гол
Венгрия футболчининг афсонаси бўлган Ференц Пушкаш номи ҳамон қалбларда дейиш мумкин. Йилнинг энг чиройли голи ғолиби ҳам айнан Пушкаш совринига эга бўлади. “Реал”да 9 йил давомида ҳаракат қилган Ференц 242 маротаба рақиблар дарвозасини аниқ нишонга олган. Жуда ҳам кўплаб жамоавий ва шахсий совринларга эга бўлган. Ференц Пушкаш 2006 йилда 79 ёшида вафот этган.
5. Сантильяна – 290 гол
Тўлиқ исми-шарифи Карлос Алонсо Гонсалес бўлган собиқ ҳужумчи “қироллик” клубида 17 йил ўйнаган. Бу вақт ичида 600дан ортиқ ўйинларда майдонга тушган.
290та голни ўз ҳисобига ёзиб, клуб тарихидаги энг яхши тўпурарлар рўйхатида 5-ўринни эгаллаган. “Реал” сафида 9 маротаба Испания чемпионига айланган. УЕФА кубоги соҳиби бўлган. Шунингдек, бошқа совринларни ҳам қўлга киритган.
4. Альфредо Ди Стефано – 308 гол
Футбол афсонаси сифатида Альфредо Ди Стефанони эслашади. “Реал”да 11 йил ўйнади. Бу вақт давомида жуда кўплаб совринларга эга бўлди. Бундан ташқари, 308та голга муаллифлик қилган.
Кейинчалик бутсаларини михга илганидан сўнг мураббийлик соҳасида ўз омадини синаган. “Реал”ни бошқарган Ди Стефано номи ҳалигача эски футбол ишқибозлари ёдида кўтарилмаган.
3. Рауль – 323 гол
Клубнинг яна бир афсонасига айланган Рауль бугунги кунда мураббийлик соҳасида фаолиятини олиб бормоқда. Собиқ ҳужумчи Роналду ва Бензема келгунига қадар жамоанинг асосий “мотори” бўлиб келган. 741та ўйинда “қироллик” клуби либосида тўп сурган.
323та голни ўз ҳисобига ёзиб қўйган ҳолда кейинчалик клубни тарк этган. Тўғри, унинг бу кўрсаткичини Роналду ва Бензема такрорлади. Лекин клуб мухлислари Раулни ҳалигача яхши кўришади.
2. Карим Бензема – 354 гол
Франциялик ҳужумчи “Реал”да ажойиб мавсумларни ўтказди. Саудияга йўл олгунига қадар Карим сермаҳсуллик намойиш этди. Умумий ҳисобда 648та ўйинда майдонга тушиб, нақ 354та голга муаллифлик қилди.
Клуб либосида энг кўп гол урган футболчилар рўйхатида 2-ўринда бормоқда. Ҳозирда Бензема Саудиянинг “Ал-Иттиҳод” сафида ҳаракат қилмоқда. Яқинда клуб билан Саудия Про-лигасида чемпионликни қўлга киритди.
1. Криштиану Роналду – 450 гол
“Олтин тўп”нинг 5 карра соҳиби бўлган португалиялик футболчи “Реал”да афсона даражасига эришди. Клуб билан кўплаб совринларга эга чиқди. 438та ўйинда 450та голга муаллифлик қилди. Бугунги кунда у клуб сафида энг кўп гол урган футболчиси бўлиб турибди.
Ҳозирда фаолиятини “Ан-Наср”да ўтказаётган 40 ёшли ҳужумчининг фаолиятидаги голлари сони 935тага етган. У 1000лик довон сари ҳаракат қилмоқда.
