Zirkze APLdagi uzoq muddatli golsiz seriyasiga yakun yasadi
«Manchester Yunayted» hujumchisi Joshua Zirkze nihoyat Angliya Premer-ligasidagi golsiz seriyasini yakunladi. Niderlandiyalik forvard 364 kundan keyin ilk bor gol urdi va 13-tur doirasidagi «Kristal Pelas»ga qarshi uchrashuvda jamoasiga 2:1 hisobidagi g‘alabani ta’minlashga yordam berdi. Bahs Londonning «Selxerst Park» stadionida o‘tdi.
Zirkzening 54-daqiqada kiritgan goli uning APL-2025/2026 mavsumidagi birinchi goli bo‘ldi. U bungacha so‘nggi marta 2024-yil 1-dekabr kuni, o‘tgan mavsumda «Everton»ga (4:0) qarshi o‘yinda gol urgan edi.
Umuman olganda, Zirkze APLdagi faoliyati davomida 38 uchrashuvda to‘rtta gol va ikki golli uzatma qayd etgan. O‘tgan yilning iyul oyida «Manchester Yunayted» uni «Bolonya»dan 42,5 million yevro evaziga sotib olgan.
