Muhim o'yinlar oldidan “Barselona” jiddiy yo'qotishga uchradi
Kataloniyaning “Barselona” klubi hujumchisi Robert Levandovski La Liganing 32-turidan o'rin olgan “Selta”ga qarshi bahsda (4:3) jarohat oldi.
AS xabariga ko'ra, polshalik futbolchi “Barselona”ning bo'lajak o'yinlarida ishtirok eta olmaydi. U son paylaridan shikastlangani tahmin qilinmoqda. Bunday holatda, uning tiklanishi uchun kamida uch hafta kerak bo'ladi.
Bundan ko'rinadiki, Levandovski 26-aprel kuni bo'lib o'tadigan “Real Madrid”ga qarshi Ispaniya Kubogi finalini o'tkazib yuboradi. Shuningdek, Leva “Inter”ga qarshi bahsda ham maydonga tushishi mavhumligicha qolmoqda.
Ma'lumot uchun, Robert Levandovski joriy mavsum La Ligada 31 ta o'yinda maydonga tushib, 25 ta gol urdi va 2 ta golli uzatmani amalga oshirdi. Uning Transfermarkt'dagi narxi 15 million yevroga baholanmoqda.
