La Liga “Barselona”ga yordam berishi mumkin
“Barselona” shu haftada “Borussiya Dortmund” ustidan umumiy 5:3 hisobida g‘alaba qozonib, Chempionlar ligasi yarim finaliga yo‘llanmani qo‘lga kiritdi.
“Barselona”ning “Inter”ga qarshi birinchi o‘yini 30-aprel kuni, javob bahsi esa 6-may kuni bo‘lib o‘tadi.
“Barselona” uchun ushbu sinovning eng qiyin tomoni shundaki, klub “Inter”ga qarshi javob o‘yinidan ikki kun oldin, 4-may kuni “Real Valyadolid”ga qarshi o‘ynashi kerak.
Shu maqsadda La Liga “Valyadolid”ga qarshi uchrashuvni boshqa vaqtga ko‘chirish orqali “Barselona”ga yordam bermoqchi. Bu haqda COPE xabar bermoqda.
Manbaga ko‘ra, “Barselona”ning “Valyadolid”ga qarshi o‘yini 3-mayga ko‘chirilishi mumkin, shu sababli kataloniyaliklar “Inter”ga qarshi javob o‘yiniga tayyorgarlik ko‘rish uchun qo‘shimcha dam olish kunlariga ega bo‘lishadi.
