JCH finali boshlanish vaqti chiqishlar va Tom Kruzning g‘alati nutqi sabab kechikdi
JCH finali boshlanish vaqti chiqishlar va Tom Kruzning g‘alati nutqi sabab kechikdi
Argentina va Ispaniya o‘rtasidagi Jahon chempionati finali belgilangan vaqtda boshlanmadi. O‘yin 6 daqiqaga kechikdi. Nyu-York — Nyu-Jersi stadionida final bahsi Britaniya vaqti bilan 20:00 da, AQSH sharqiy vaqti bilan esa 15:00 da boshlanishi kerak edi. Biroq dunyodagi eng ko‘p tomosha qilinadigan sport voqealaridan biri bo‘lgan uchrashuv 20:06 dagina start oldi.
Uchrashuv boshlanishidan avval Robbi Uilyams sahnaga chiqdi, Jennifer Hadson davlat madhiyasini ijro etdi, aktyor Tom Kruz esa o‘yinoldi g‘alati nutq so‘zladi. Shuningdek, mashhur ring e’lonchilari — Maykl va Bryus Baffer aka-ukalari final oldidan muxlislarni o‘ziga xos shou bilan qizdirdi.
Bundan tashqari, start hushtagidan 90 daqiqa avval Jahon chempionatining yopilish marosimi ham bo‘lib o‘tdi. Unda Post Meloun va strimer AyShouSpid chiqish qildi. Jahon chempionati kubogi esa maydonga Ispaniyaning 2010-yilgi chempioni Andres Inyesta, Argentinaning 1978-yilgi chempioni Mario Kempes, tennis yulduzi Karlos Alkaras hamda “Kalmar o‘yini” seriali aktrisasi Ho Yon tomonidan olib chiqildi.
JCH finali oldidan hayajon tobora ortib borayotgan bir paytda Tom Kruz sahnaga chiqib, muxlislarga murojaat qildi.
— So‘nggi bob uchun jam bo‘lgan ekanmiz, keling, butun dunyoni birlashtirgan turnirni nishonlaylik. Bir-birimizni qadrlaylik. Bu — futbol. Bu — birdamlik. Bu — buyuklik, — dedi u monologida.
Jahon chempionati finalida tanaffus paytida ham kengaytirilgan shou bo‘lib o‘tishi kutilmoqda. Shakira va Madonna chiqishlari sabab ikkinchi bo‘lim boshlanishi ham bir necha daqiqaga kechikishi mumkin.
Donald Trampning o‘yinga tashrifi esa xavfsizlik choralarini yanada kuchaytirdi. Yuzlab jurnalistlar, san’atkorlar va ko‘ngillilar stadionga kirishdan oldin uch soatgacha navbatda kutishga majbur bo‘ldi.
Lionel Messi boshchiligidagi Argentina 1962-yildagi Braziliyadan keyin Jahon chempionligi unvonini himoya qilgan ilk jamoaga aylanishga harakat qilmoqda. Ispaniya esa tarixida ikkinchi bor Jahon chempionatida g‘olib chiqish va Yevro-2024dagi zafariga yana bir yirik sovrin qo‘shishni maqsad qilgan.
Ispaniya yarim finalda Fransiyani 2:0 hisobida ishonchli tarzda mag‘lub etganidan so‘ng final favoriti sifatida ko‘rilmoqda. Shu bois Luis de la Fuente o‘sha uchrashuvdagi boshlang‘ich tarkibni o‘zgarishsiz qoldirgani ajablanarli emas.
