Bundesliga. «Bavariya» soʻnggi daqiqalarda gʻalabani tortib oldi
Germaniya Bundesligasining 12-turidan o‘rin olgan «Bavariya» — «Sankt-Pauli» uchrashuvi yakuniga yetdi. «Arena Myunxen» stadionidagi bellashuv mezbonlarning 3:1 hisobidagi g‘alabasi bilan tugadi.
Uchrashuv juda erta gol bilan boshlandi: 6-daqiqada Andrea Untondji mehmonlarni oldinga olib chiqdi. «Bavariya» birinchi bo‘lim oxirida hisobni tenglashtirdi — 44-daqiqada Rafael Gerreyru aniq zarba bilan javob qaytardi.
Asosiy vaqtga qo‘shib berilgan daqiqalarda myunxenliklar o‘yinni o‘z foydasiga og‘dirib oldi: 90+4-daqiqada Luis Dias g‘alaba golini urdi, 90+7-daqiqada esa Nikolas Jekson hisobni ishonchli ko‘rinishga keltirdi.
Mazkur natijadan so‘ng «Bavariya» 34 ochko bilan Germaniya chempionatida peshqadamlikni davom ettirmoqda. «Sankt-Pauli» esa atigi 7 ochko bilan turnir jadvalida 17-o‘rinda qolmoqda.
Keyingi turda myunxenliklar 6 dekabr kuni safarda «Shtutgart»ga qarshi maydonga tushadi. Xuddi shu kuni «Sankt-Pauli» ham safarda «Kyoln»ga qarshi o‘yin o‘tkazadi.
