Ўзбек теннисчиси Сергей Фомин Қозоғистондаги халқаро турнирда иштирокини давом эттирмоқда
Шимкент шаҳрида (Қозоғистон) 15 000 долларлик соврин жамғармасига эга ITF M15 серияси турнир бўлиб ўтмоқда. Унда Ўзбекистоннинг иккинчи рақамли теннисчиси Сергей Фомин иштирок этмоқда.
Якунланган 1/8 финал баҳсида Фомин қийин ғалабага эришди — у Бекхан Алтангеревни 7:5, 4:6, 6:4 ҳисобида мағлуб этди. Учрашув 2 соат 50 дақиқа давом этди. Шимкент турнирининг биринчи рақамли теннисчиси саналган Фомин ҳозирда ATP рейтингида 461-ўринни эгаллаб турибди. Унинг рақиби 24 ёшли Бекхан Алтангерев — 994-поғонада жойлашган.
Бундан ташқари, Сергей Фомин жуфтлик баҳсларида ҳам муваффақиятли ҳаракат қилмоқда. У Павел Вербен билан биргаликда чех дуэлини 6:2, 7:5 ҳисобида мағлуб этиб, кейинги босқичга чиқди. Яккалик мусобақаси чорак финалида Фомин Константин Женовга қарши кураш олиб боради.
