Жозе Моуриньюнинг қайтиши Винисиус учун муаммо туғдирмайди
Мадриднинг «Реал» клуби қанот ҳужумчиси Винисиус Жуниор учун мураббий Жозе Моуриньюнинг жамоага қайтиши эҳтимоли муаммо ҳисобланмайди.
Бразилиялик футболчининг «Бенфика» яримҳимоячиси Жанлука Престианни билан содир бўлган можаросида португалиялик мутахассис ўзига хос позицияни эгаллаган эди. Маълумот учун, Моуринью 2025 йилнинг сентябрь ойидан буён Лиссабон клубини бошқариб келмоқда. Бу ҳақда The Athletic хабар бермоқда.
17 февраль куни Европа Чемпионлар Лигаси плей-офф босқичи доирасида бўлиб ўтган «Реал» ва «Бенфика» учрашувида Винисиус Престианни томонидан ирқчилик руҳидаги ҳақоратларга учраганини маълум қилган эди. Ўйиндан сўнг Моуринью бразилиялик ҳужумчининг ўзи ушбу воқеага провокация сабабчиси бўлган бўлиши мумкинлигини тахмин қилганди.
Кейинчалик Престианни ушбу воқеа сабабли олти та ўйинга дисквалификация қилинди.
