Ўзбекистон Кубоги яримфиналчилари шу кунда маълум бўлади
Қуръа ташлаш маросими "Жар" стадионида ўтказилиб, Футбол TV орқали жонли эфирда намойиш этилади
Расм: Telegram
Ўзбекистон футбол кубогининг энг масъулиятли босқичи — яримфинал учун қуръа ташлаш айнан шу кунда амалга оширилади. Бу ҳақда ЎзПФЛ матбуот хизмати хабар берди. Қуръа ташлаш маросими "Бунёдкор" — "Бухоро" ўйини якунга етгач "Жар" стадионида бўлиб ўтади. Мухлислар жараённи Футбол TV орқали тўғридан-тўғри эфирда кузатишлари мумкин.
Ҳозирча яримфиналда иштирок этиши аниқ бўлган икки жамоа бор: "Сўғдиёна" ва "Пахтакор". Энди улар қуръа орқали рақибини билиб олади.
Бугун яримфиналга сўнгги йўлламалар учун икки муҳим баҳс кутилмоқда:
• соат 18:30 да "Динамо" — "Шўртан"
• соат 19:30 да "Бунёдкор" — "Бухоро"
Кубокдаги ҳар бир баҳс мухлисларига алоҳида завқ улашмоқда ва бугунги натижалар яримфинал таркибини тўлиқ белгилаб беради.
Бакрадзе Иман
Редактор
