Юльманн: «Менинг номим «Реал» каби клуб билан боғланаётгани — катта шараф»
“Спортинг” ярим ҳимоячиси Мортен Юльманн “Реал” жамоасига эҳтимолий ўтиши ҳақидаги хабарларга муносабат билдирди.
Аввалроқ COPE хабарига кўра, Жозе Моуринью “Реал”га тайинланишига яқин ва у клубдан айнан даниялик футболчини сотиб олишни сўраши мумкин.
“Менинг номим “Реал” каби клуб билан боғланаётгани — катта шараф. Лекин мен ҳозир “Спортинг”даман ва бу клуб мен учун жуда қадрли. Ҳозир бор эътиборимни шу ердаги ўйиним ва навбатдаги учрашувга қаратганман. Келажагим ҳақида ўйиндан кейин албатта гапираман”, — деди у Marcaга берган интервьюсида.
Жорий мавсумда Юльманн барча мусобақаларда 44 та ўйинда иштирок этиб, 3 та гол ва 6 та голли узатма амалга оширган. Унинг Лиссабон клуби билан шартномаси 2028 йил ёзигача амал қилади.
Transfermarkt маълумотига кўра, футболчининг бозор қиймати тахминан 45 миллион еврони ташкил этади.
