Винисиус Жуниор ва «Реал» ўртасидаги янги шартнома бўйича музокараларга тўсқинлик қилаётган асосий омил маълум бўлди
Винисиус Жуниор ва «Реал» ўртасидаги янги шартнома бўйича музокараларга тўсқинлик қилаётган асосий омил маълум бўлди.
Бразилиялик вингернинг амалдаги шартномаси 2027 йил июнига қадар мўлжалланган бўлиб, унинг йиллик маоши тахминан 18 миллион еврони ташкил этади. 2025 йилда клуб унга 20 миллион евролик янги битим таклиф қилган, бироқ футболчи томони буни рад этиб, ўз шартларини илгари сурган. Клуб эса бунга рози бўлмаган ва томонлар ҳанузгача бир тўхтамга келмаган.
The Athletic хабарига кўра, асосий келишмовчилик – шартнома имзолаганлик учун бериладиган бонус миқдорида. «Реал» клубдаги маошлар лимитини оширишни истамайди, шу сабабли Винисиуснинг вакиллари даромадни кўпайтиришнинг ягона йўли сифатида айнан шу бонусга умид қилмоқда.
Футболчининг вакиллари Килиан Мбаппени мисол қилиб келтирмоқда. Мбаппе ҳам Винисиус билан деярли бир хил маош олади, лекин «ПСЖ»дан ўтиш вақтида Винисиусга таклиф қилинаётганидан анча катта миқдорда бонус олишга эришган.
«Мадрид» раҳбарияти Винисиуснинг талабини қондириш жамоа ичида бошқа шартномаларни узайтириш жараёнида хавфли «домина эффекти»ни келтириб чиқаришидан хавотирда. Қайд этилишича, агар бу янги битим имзоланишига ёрдам берса, футболчи ўз талабларини пасайтиришга тайёр.
