Вальверде «Реал» машғулотларига қайтди
Федерико Вальверде “Реал Мадрид” машғулотларига муддатидан олдин қайтди. Бу ҳақда Football Espana хабар берди.
Маълумотларга кўра, у жамоадоши Орельен Тчуамени билан юзага келган можаро сабаб 8 кунни ўтказиб юборган. Тўқнашув натижасида Вальверде бошидан жароҳат олиб, ҳатто шифохонага ётқизилган. Ҳар икки футболчи клуб томонидан 500 минг евро миқдорида жаримага тортилган.
Тиббий штаб 27 ёшли уругвайликка 10–15 кун тикланишни тавсия қилган эди, аммо у белгиланган муддатдан бир неча кун олдин сафга қайтди. Шу боис, Вальверде якшанба куни бўлиб ўтадиган “Севилья”га қарши ўйин учун қайдномага киритилиши мумкин.
Шу билан бирга, жамоа ичидаги вазият ҳали ҳам кескинлигича қолмоқда. ОАВ маълумотларига кўра, айрим футболчилар Вальверденинг ёзда клубни тарк этишини қўллаб-қувватламоқда. Унга қизиқиш билдирган жамоалар қаторида Пари Сен-Жермен ва Манчестер Юнайтед тилга олинмоқда. Бироқ футболчининг ўзи ҳозирча Мадрид клубини тарк этиш ниятида эмас.
