UEFA «Барселона»га уй ўйинларини янгиланган «Камп Ноу»да ўтказишга рухсат берди
UEFA «Барселона» ва «Айнтрахт» ўртасидаги Чемпионлар лигаси учрашуви янгиланган «Камп Ноу» стадионида ўтказилишини расман тасдиқлади. Mundo Deportivo хабарига кўра, каталонияликлар арена инспекциясидан сўнг тегишли рухсатни қўлга киритди.
Стадион текшируви Ла Лига доирасидаги «Алавес»га (3:1) қарши ўйин чоғида амалга оширилди. UEFA вакиллари аренанинг техник ҳолати ва хавфсизлик чораларини баҳолади: эвакуация йўлаклари, навигация тизими, кириш-чиқиш хизматларининг фаолияти ҳамда мухлислар оқимини бошқариш жараёнлари кўздан кечирилди.
Бир неча соатлик текширув ва клуб раҳбарияти билан суҳбатлардан сўнг инспекторлар ижобий хулоса чиқарди. Бу қарор «блауграна»ларга Еврокубок учрашувини ўз уй майдонида ўтказишга имкон беради.
Чемпионлар лигасининг умумий босқичидаги 6-тур учрашуви 9 декабрга белгиланган бўлиб, у қайта қурилган «Камп Ноу»даги турнирнинг илк ўйини бўлади.
