UEFA «Barselona»ga uy oʻyinlarini yangilangan «Kamp Nou»da oʻtkazishga ruxsat berdi
UEFA «Barselona» va «Ayntraxt» o‘rtasidagi Chempionlar ligasi uchrashuvi yangilangan «Kamp Nou» stadionida o‘tkazilishini rasman tasdiqladi. Mundo Deportivo xabariga ko‘ra, kataloniyaliklar arena inspektsiyasidan so‘ng tegishli ruxsatni qo‘lga kiritdi.
Stadion tekshiruvi La Liga doirasidagi «Alaves»ga (3:1) qarshi o‘yin chog‘ida amalga oshirildi. UEFA vakillari arenaning texnik holati va xavfsizlik choralarini baholadi: evakuatsiya yo‘laklari, navigatsiya tizimi, kirish-chiqish xizmatlarining faoliyati hamda muxlislar oqimini boshqarish jarayonlari ko‘zdan kechirildi.
Bir necha soatlik tekshiruv va klub rahbariyati bilan suhbatlardan so‘ng inspektorlar ijobiy xulosa chiqardi. Bu qaror «blaugrana»larga Yevrokubok uchrashuvini o‘z uy maydonida o‘tkazishga imkon beradi.
Chempionlar ligasining umumiy bosqichidagi 6-tur uchrashuvi 9 dekabrga belgilangan bo‘lib, u qayta qurilgan «Kamp Nou»dagi turnirning ilk o‘yini bo‘ladi.
