Тер Штеген ёзда «Барселона»ни тарк этиши мумкин
«Барселона» дарвозабони Марк-Андре тер Штеген ёзги трансферлар ойнасида клубни тарк этиши мумкин, деб хабар беради Mundo Deportivo.
Манбага кўра, 34 ёшли германлик дарвозабонни «блауграна» раҳбарияти келаси мавсум учун асосий вариант сифатида кўрмаяпти. Шу билан бирга, ҳар икки томон ҳам клубни, ҳам ўйинчини қониқтирадиган ечим топишга тайёр экани қайд этилган.
Тер Штегеннинг ўзи таклифларни тинглашга ва бошқа жамоага ўтишга тайёр. Унинг учун устуворлик – яна асосий дарвозабон бўлиб, мунтазам ўйин амалиётига эга бўлиши мумкин бўлган лойиҳадир.
Шунга қарамай, футболчининг «Барселона» билан амалдаги шартномаси 2028 йилнинг ёзига қадар мўлжалланган, шунинг учун унинг клубда қолиб, янги мавсумга тайёргарликни бошлаши ва мавсумолди ўйин вақтига эга бўлиши мумкин бўлган вариант ҳам мавжуд.
Каталония клуби, ўз навбатида, эҳтимолий трансферга, жумладан, ижара вариантига ҳам ёрдам беришга тайёр. Шунингдек, «Барселона»нинг ўйинчи маошининг бир қисмидан ҳали ҳам қарздорлиги борлиги ва бу тўловлар кечиктирилгани ҳақида хабар берилган.
Жорий мавсумда тер Штеген «Барселона» сафида битта ўйин ва мавсумнинг иккинчи ярмида ижарага кетган «Жирона» сафида иккита ўйин ўтказди. У январ ойидан бери сонининг орқа юзаси мушаклари йиртилиши туфайли ўтказилган жарроҳлик амалиётидан сўнг ўйнамаяпти.
