Шлоттербек фаолиятини «Реал» ёки «Бавария»да давом эттирмоқчи — манба
Дортмунднинг «Боруссия» клуби марказий ҳимоячиси Нико Шлоттербек «Бавария» ёки Мадриднинг «Реал» клубига ўтиш истагини билдирган.
Sky Sport Germany хабарига кўра, футболчи ушбу грандлардан бирига эҳтимолий трансферни жиддий кўриб чиқмоқда. 23 ёшли ҳимоячига «Барселона» ҳам қизиқмоқда, бироқ каталонияликлар учун ҳозирча асосий устувор вазифа — ҳужумчи топиш.
Шлоттербекнинг «Боруссия» билан амалдаги шартномаси 2027 йил 30 июнгача мўлжалланган. Шунга қарамай, клуб унга 2030 йилгача давом этадиган, яхшиланган шартлар билан янги битим таклиф қилган. Агар футболчи рози бўлса, у жамоанинг энг кўп маош оладиган ўйинчиларидан бирига айланиши мумкин, бу эса унинг келажак борасидаги қарорини ўзгартирадиган омилга айланиши эҳтимол.
Transfermarkt портали Шлоттербекнинг бозор қийматини 40 миллион евро деб баҳоламоқда.
