Саудиянинг икки клуби Рафиньяга қизиқиш билдирмоқда
Бразилия терма жамоаси ва "Барселона" футбол клуби ярим ҳимоячиси Рафинья ёзги трансфер ойнасидан жамоани тарк этиши мумкин. Бу ҳақда журналист Ферран Мартинес ижтимоий тармоқда маълум қилди.
Манбанинг маълумотига кўра, бразилиялик вингерга Саудия Арабистонининг иккита клуби — "Ал-Наср" ва "Ал-Ҳилол" қизиқиш билдирган. Уларнинг ҳар иккала клуби 29 ёшли футболчи учун 80 млн евро тўлашга тайёр. Клублар футболчининг маошини тўрт баробарга оширишга тайёр.
Рафиньянинг "Барселона" билан амалдаги шартномаси 2028 йилнинг июнь ойида якунга етади. Жорий мавсумда бразилиялик футболчи клуб сафида 33 та ўйинда иштирок этиб, 21 та гол урди ва 8 та голли узатмани амалга оширди. Transfermarkt портали маълумотларига кўра, футболчининг бозор қиймати 70 млн еврони ташкил қилади.
