Санчес: «Хотиржамликни сақладик ва имкониятлардан фойдаландик»
“Челси” дарвозабони Роберт Санчес Англия чемпионатининг 37-турида “Тоттенхэм”га қарши ўйиндаги (2:1) ғалаба ҳақида фикр билдирди.
"Бизда ўйинга тайёргарлик учун атиги 48 соат бор эди, шунинг учун осон бўлмади, айниқса финалдан кейин, у ерда соврин ютиш имконимиз бор эди. Аммо биз кайфиятимизни ўзгартириб, яна бор кучимизни беришимиз керак эди, чунки уч очко олсак, дам олиш кунларида ҳам еврокубокларга чиқиш имконияти сақланиб қолишини билардик. Шундай ҳам бўлди — яхши машқ қилдик ва йигитлар майдонга чиқиб ўзларини кўрсатишди.
Биз “Тоттенхэм” катта энергия билан келишига тайёр эдик. Улар жон сақлаш учун курашаётгани аниқ эди, шунинг учун 90 дақиқа давомида уларга мос даражада ҳаракат қилишимиз керак бўлди. Ўйлашимча, жамоа бу вазифани бажара олди. Керак пайтда босим остида хотиржамликни сақладик ва имкониятлардан фойдаландик.
Албатта, ўтказиб юборилган голдан кейин вазият бироз ўзгарди, рақиб руҳланиб кетди. Аммо биз буни ҳам тўғри қабул қилдик ва ғалабага эришдик.
Бу катта дерби эди, мавсумдаги сўнгги уй ўйинимиз ҳам бўлди. Шунинг учун мухлисларимиз ва ўзимиз учун ғалаба қозонганимиздан жуда хурсандман. Биз уларга ғалаба тақдим этмоқчи эдик», — деди Санчес клубнинг расмий сайтига берган интервьюсида.
