«Челси» футболчилари Хаби Алонсо бош мураббий этиб тайинланишини қўллаб-қувватламоқда
«Челси» футболчилари Хаби Алонсо жамоа бош мураббийи этиб тайинланиши бўйича қарорни тўлиқ маъқуллашди. Лондон клуби ва мутахассиснинг вакиллари ўртасидаги музокаралар ижобий руҳда давом этмоқда.
The Guardian нашри хабарига кўра, жамоа аъзолари «Реал» ва «Байер»нинг собиқ мураббийини клубни яна ғалабалар йўлига қайтаришга қодир идеал номзод деб ҳисобламоқда.
Лондонликлар таркибидаги футболчилар янги мураббий кийиниш хонасида сўзсиз нуфузга эга бўлиши кераклигига аминлар. Алонсонинг ёрқин футболчилик фаолияти ва мураббий сифатидаги катта муваффақиятлари ушбу мезонга тўлиқ жавоб беради.
Ҳозирча расмий келишувга эришилмаган бўлса-да, Алонсо «Челси» директорлар кенгашининг қисқа рўйхатида биринчи ўринда туради. Мазкур рўйхатдан, шунингдек, Андони Ираола, Марку Силва ва Оливер Гласнер ҳам жой олган. Мураббий тайинлаш жараёни Англия кубоги финалидан сўнг тезлашиши кутилмоқда. Алонсо, ўз навбатида, клубдан маълум кафолатлар, жумладан, трансфер сиёсатида овоз бериш ҳуқуқини талаб қилмоқда. Клуб раҳбарияти унинг юқори мақомини тан олган ҳолда, бу шартларга рози бўлишга тайёр кўринади.
Қайд этиш жоизки, испан мутахассиси 2026 йилнинг январ ойида «Реал»дан кетганидан буён ишсиз бўлиб турган эди.
