«Реал» Марокаш терма жамоасининг 70 млн евродан қимматроқ футболчисини нишонга олди — Sky Sport Germany
Мадриднинг «Реал» клуби Марокаш терма жамоаси ва «Лилль» клубининг 18 ёшли ярим ҳимоячиси Айюб Буаддига қизиқиш билдираётган етакчи клублардан бири ҳисобланади.
Футболчи 2026 йилги жаҳон чемпионати гуруҳ босқичининг 1-турида Бразилияга қарши (1:1) ўйиндан сўнг топ-жамоаларнинг қўшимча эътиборини тортди. Бу ҳақда Sky Sport Germany хабар бермоқда.
Манбага кўра, «Лилль» футболчининг трансфери бўйича 70+ млн евролик таклифларни кўриб чиқишга тайёр.
Бразилияга қарши ўйинда Буадди 66 та узатмадан 60 тасини аниқ амалга оширган, шунингдек, 87 марта тўпга теккан.
Ўтган мавсумда Буадди барча турнирларда 42 та ўйинда иштирок этиб, битта голли узатмани амалга оширган. Футболчининг клуб билан амалдаги меҳнат шартномаси 2029 йилнинг ёзигача мўлжалланган.
Transfermarkt порталида тақдим этилган маълумотларга кўра, футболчининг бозор қиймати 50 млн еврони ташкил этади.
