“Реал” Ла Лига раҳбари устидан шикоят қилди
Мадриднинг “Реал” клуби Испания Олий спорт кенгашига (CSD) Ла Лига президенти Хавер Тебас устидан махфийлик ва профессионал этика қоидаларини жиддий бузгани учун расман шикоят қилди. Спорт маъмурий трибуналига (TAD) юборилган иш қабул қилинди ва кўриб чиқилмоқда.
Шикоят Тебаснинг 2023-йил апрелида бўлиб ўтган ички овоз бериш сирини сақлай олмагани ҳақидаги иддаога асосланади. Аноним сўров шаклида ташкил этилган овоз бериш клубларнинг ҳакамлик стандартлари бўйича фикрларини йиғишга қаратилган эди.
Тебас ижтимоий тармоқдаги постида унинг мазмунини, жумладан, клуб позициясини ошкор қилиб, овоз беришнинг махфийлигини бузганлиги даъво қилинмоқда. Мадрид клуби раҳбарияти бу нафақат аноним сўров шартларини бузади, балки иштирокчи клубларнинг асосий ҳуқуқларини ҳам поймол қилади, бу эса лига бошқаруви яхлитлигига путур етказиши мумкин, деб ҳисоблайди.
"Реал Мадрид" Тебаснинг ҳаракатини "жуда жиддий қоидабузарлик" деб ҳисоблайди.
