«Реал» Энцо Фернандес билан келишувга эришди — манба
«Реал» «Челси» ва Аргентина терма жамоаси ярим ҳимоячиси Энцо Фернандес билан шартнома борасида келишувга эришди. Бу ҳақда инсайдер Николо Скира Х ижтимоий тармоғида хабар бермоқда.
Манбанинг хабарига кўра, испан гранди ва футболчи ўртасида 2032 йилгача мўлжалланган шартнома борасида принципиал келишувга эришилган.
Таъкидланишича, «Реал» ярим ҳимоячини ўз сафига қўшиб олиш учун «Челси»га йирик таклиф тайёрламоқда, футболчининг ўзи ҳам Лондон клубини тарк этиб, «Мадрид»га ўтишни истамоқда.
Бошқа бир инсайдер Маттео Моретто аргентиналик футболчи испан грандининг асосий трансфер мақсади эканлигини маълум қилди.
Аввалроқ «Челси» Фернандеснинг трансфери учун 138 млн евро сўрагани хабар қилинганди.
Ўтган мавсумда Фернандес барча мусобақаларда 54 та ўйинда иштирок этиб, 15 та гол ва 7 та голли узатмани ўз ҳисобига ёздириб қўйди. Унинг клуб билан амалдаги шартномаси 2032 йилнинг ёзигача мўлжалланган.
Transfermarkt портали маълумотларига кўра, ярим ҳимоячининг бозор қиймати 90 млн еврони ташкил этади.
