Расман: «Ан Наср»дан трансфер таъқиқи олиб ташланди
Халқаро футбол федерацияси (FIFA) Саудия Арабистонининг «Ан Наср» клубига янги футболчиларни сотиб олиш ва рўйхатдан ўтказишга қўйилган таъқиқни бекор қилди. Бу ҳақда журналист ва инсайдер Фабрицио Романо X ижтимоий тармоғида хабар берди.
Манбага кўра, FIFA «Ан Наср» клубининг барча мажбуриятларни тўлиқ бажарганини тасдиқлаган. Қайд этилишича, клубга нисбатан очилган иш ёпилган.
Аввалроқ ОАВда ушбу трансфер таъқиқи 2023 йилда марказий ҳимоячи Эмерик Ляпортнинг трансфери бўйича «Манчестер Сити» олдидаги қарздорлик сабабли жорий этилгани ҳақида хабарлар тарқалган эди. Таъкидланишича, Саудия клуби «шаҳарликлар»га тахминан 9 млн евро тўловни амалга оширмаган, қарзни ёпиш муддати эса 31 август куни якунланган. Ўтган кузда Ляпорт «Ан Наср»дан «Атлетик» клубига кўчиб ўтганди.
Эслатиб ўтамиз, «Ан Наср» сафида беш карра «Олтин тўп» соҳиби Криштиану Роналду тўп сурмоқда.
