Pedrining қачон сафга қайтиши маълум бўлди
«Барселона» яримҳимоячиси Педри жароҳатидан сўнг тикланиш жараёнини давом эттирмоқда ва у Ла Лиганинг 13-турида «Атлетик»га қарши ўйинда майдонга қайтиши мумкин. Бу ҳақда Marca нашри хабар бермоқда.
Шунга қарамай, клуб тиббий штаби футболчининг соғлиғини хавф остига қўймаслик учун Педрининг тикланиш жараёнини шошилмасдан олиб бормоқда. Каталонияликлар уни фақат тўлиқ тайёр ҳолатда майдонга тушириш ниятида.
Эслатиб ўтамиз, 22 ёшли футболчи октябрь ойи охирида чап сонининг икки бошли мушаги дистал қисмида жароҳат олган, шунингдек, шикастланган жойда суяк синши ҳам аниқланганди. Аввалроқ Педри олти ҳафта майдондан четда қолиши хабар қилинганди.
Маълумот учун, Педри жорий мавсум барча турнирларда 13 та ўйинда майдонга тушиб, 2 та гол урди ва 2 та голли узатмани амалга оширди.
